Debuton TBU Tech Academy, përgatit maturantë, studentë dhe profesionistë ekselentë për tregun e IT
Çeli sot siparin në mjediset e Tirana Business University, TBU Tech Academy, e cila synon të bëhet qendra kryesore e ekselencës për edukimin dhe trajnimin e teknologjisë së informacionit në Shqipëri, duke përgatitur profesionistë të aftë për të përballuar sfidat e tregut global të teknologjisë.
Misioni i TBU Tech Academy është të ofrojë arsim të avancuar dhe trajnime praktike në fushat kryesore të teknologjisë së informacionit, duke përgatitur studentët dhe profesionistët për certifikime ndërkombëtare dhe duke i ndihmuar ata të zhvillojnë karrierën e tyre në IT.
Maturantët, studentët, profesionistë në TIK dhe kompani që kërkojnë të përmirësojnë aftësitë e tyre në IT ose të kalojnë në industrinë e teknologjisë, do të kenë mundësinë t’i bashkohen kësaj Akademie, për t’u zhvilluar edhe më tepër profesionalisht.
Administratori i TBU, Dr. Altin Sholla, theksoi: “Nuk ka aftësim praktik të mirë në IT, pa Tech Academy, sepse të gjithë ata profesionistë që duan të zhvillohen më tej, përveç teorisë, duhet të kenë dhe aftësitë praktike për t’u zhvilluar në fushat përkatëse”.
“Do të jemi në tregun e profesionistëve të certifikuar ndërkombëtarisht,” – vijoi më tej ai.
Ndërkohë dekani i Fakultetit të Teknologjisë së Informacionit në TBU, Prof. Asoc. Dr. Indrit Baholli, u shpreh se kjo është një mundësi shumë e mirë për të gjithë pjesëmarrësit që të nisin sa më shpejt praktikën në tregun e punës dhe të integrohen menjëherë në të.
Tech Academy, ndër të tjera, do të trajnojë kurse të ndryshme për të formuar me aftësi konkrete pjesëmarrësit në tema si: Introduction to Cybersecurity, Advanced Cybersecurity Techniques, Introduction to Agile, Advanced Agile Practices.
Të gjithë të interesuarit mund të na kontaktojnë në kanalet tona të komunikimit për t’u regjistruar.
